CCCXXXII.

1426, November 10. Ottmachau.

Vgl. No. CCCXXVII.

Conradus dei gracia episcopus Wratislaviensis discretis viris, dominis in Heyda, in Rosmank et in Quitchendorff ecclesiarum rectoribus salutem in domino. Mandamus vobis et cuilibet vestrum, quatenus peremptorie moneatis, vos domine in Heyda, dominam Annam relictam Sigismundi Pogrell et Conradum Schedil in Habirdorff, necnon scultetos, rusticos, agricultores omnes et singulos ibidem, videlicet in utroque Habirdorff, in Rosmank et in Wenczilsberg; sed vos, domine in Rosmank, feodales, scultetos, rusticos, agricultores omnes et singulos in Heyda et in Klusczaw; vos autem, domine in Quitchendorff, moneatis nichilominus feodales, scultetos, rusticos, agricultores omnes et singulos in Lamprechtsdorff et in Radisschindorff manentes. Quos et monemus per presentes, ut infra octo dies continuos a vestris monicionibus ipsis faciendis, venerabili patri, domino abbati et conventui monasterii Kamencz de fertonibus decimalibus anni presentis satisfaciant, ut tenentur. Alioquin ipsos et eorum quemlibet tamquam nominatim expressos, extunc prout exnunc dicta canonica monicione premissa exigente iusticia excommunicamus dei nomine in hiis scriptis, quos sic excommunicatos primo semel adminus in ipsorum ac demum in vestris ecclesiis singulis diebus dominicis publicetis, donec a nobis fuerint absoluti. Datum Othmuchow Xma die Novembris anno domini M°.CCCC°.XXVI° Litteram reddite sigillatam diem execucionis presentibus consignando.
Plebanus in Rosmank fecit execucionem in dominica videlicet in dedicacione Romana.
Execucio facta est per plebanum in Heyda dominica proxima post Martini.
Execucio facta est die dominica post festum sancti Briccii in Quitchendorff.

Or. Papier. Das S. des Bischofs, sowie drei andere auf der Rückseite aufgedrückt gewesene Siegel sind gänzlich zerstört.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.